لاہور 01 مارچ 2023 : محکمہ لائیوسٹاک میں پولٹری مصنوعات کی صورتحال بارے اعلیٰ سطحی ویڈیولنک اجلاس کا انعقاد ہوا جس کی صدارت سیکرٹری لائیوسٹاک محمد مسعود انور نے کی۔
اجلاس میں ایڈیشنل و ڈپٹی سیکرٹریز، ڈائریکٹر جنرل(ریسرچ)اور ڈویژنل ڈائریکٹرز نے بذریعہ ویڈیو لنک شرکت کی۔
سیکرٹری لائیوسٹاک محمد مسعود انور نے ویڈیولنک اجلاس میں خطاب کرتے ہوئے کہا، کہ پولٹری سیکٹر کی مجموعی صورتحال کو بہتر کرنا ہم سب کا بنیادی فرض ہے۔ اُن کا کہنا تھا کہ پولٹری کی پیداوار سپلائی اور قیمتوں بارے مستند ڈیٹا کا حصول یقینی بنانا ہو گا۔ نیزپولٹری مصنوعات کی پیداواری استعداد اور فورکاسٹنگ کیلئے میکا نزم تشکیل دیا جا رہا ہے۔ سیکرٹری لائیوسٹاک نے ہدایات جاری کیں کہ پنجاب سے دیگر صوبوں کو بھیجی جانے والی پولٹری مصنوعات کا ڈیٹا بھی اکٹھا کیا جائے۔ نیزڈائریکٹر پولٹری ریسرچ انسٹی ٹیوٹ سائنسی بنیادوں پر پولٹری کی قیمتوں کے تعین کیلئے میکانزم مرتب کریں۔ سیکرٹری لائیوسٹاک کا مزید کہنا تھا کہ تمام پولٹری فارمز و فیڈ ملز کی جیو ٹیکنگ کی جائے گی، نیز تمام غیر رجسٹر شدہ پولٹری فارمز اور فیڈ ملز کی رجسٹریشن کا عمل تیز کیا جائے۔
