منہ کھر بیماری کے نقصانات کو کم کرنے کےلئے ویکسین کی پیداواری صلاحیت کو مزید بہتر بنانے کی ہدایت
صوبائی وزیر لائیوسٹاک وزراعت سید عاشق حسین کرمانی کی زیر صدارت لائیوسٹاک ڈیپارٹمنٹ میں اہم اجلاس کا انعقاد
لاہور( نمائندہ خصوصی)صوبائی وزیر لائیو سٹاک و زراعت سیدعاشق حسین کرمانی کی زیر صدارت لائیو سٹاک ڈیپارٹمنٹ میں اہم اجلاس منعقد ہوا جس میں وزیر اعلیٰ پنجاب لائیو سٹاک کارڈ ،جنوبی پنجاب کی دیہی بیوہ و مطلقہ خواتین میں لائیو سٹاک اثاثہ جات کی تقسیم کے منصوبوں پر پیش رفت اور محکمہ کی کارکردگی کا جائزہ لیا گیا۔سیکرٹری لائیو سٹاک پنجاب ثاقب علی عطیل نے بھی اجلاس میں شرکت کی۔ صوبائی وزیر لائیو سٹاک و زراعت سید عاشق حسین کرمانی کا اس موقع پر کہنا تھا کہ وزیر اعلیٰ پنجاب مریم نواز شریف کی قیادت میں پنجاب حکومت لائیو سٹاک سیکٹر کی ترقی کے لیے پر عزم ہے۔
لائیو سٹاک کارڈ سے نر بچھڑے/کٹٹرے رکھنے والے مویشی پال فارمرز کو 27ہزار فی جانور جبکہ مجموعی طور پر ایک لاکھ 35ہزار روپے سے 2 لاکھ 70ہزار روپے بلا سود قرض کی سہولت فراہم کی جا رہی ہے۔دو سالوں میں زیادہ سے زیادہ 80ہزار مویشی پال کسانوں کو 4لاکھ جانور دیئے جائیں گے۔اب تک 12ہزار 863کارڈ کسانوں نے وصولی کر لیے ہیں۔اُن کا مزید کہنا تھا کہ لائیو سٹاک کارڈ کی فارمرز کو بروقت ڈلیوری کے حوالے سے کسی قسم کی کوتاہی برداشت نہیں کی جائے گی۔تمام ڈویژنز میں تعینات ڈائریکٹرز کو روزانہ کی بنیاد پر بذات خود لائیو سٹاک کارڈ ڈلیوری سنٹرز کے دورے کرنے کے احکامات جاری کئے۔
ایسے فارمرز جن کے کارڈز سنٹرز پر پہنچ گئے ہیں اور وہ کارڈ وصولی کے لیے نہیں آرہے ہیںان سے رابطہ کیا جائے۔صوبائی وزیر لائیو سٹاک نے کہا کہ لائیو سٹاک ڈیپارٹمنٹ مویشی پال فارمرز کو لائیو سٹاک کارڈ کے آنے والے تمام مراحل ٹیگنگ،ویکسینشن اور ان سیمنیشن کے بارے میں آگاہ کرئے گا تاکہ مویشی پال کسانوں کو اس حوالے سے کسی قسم کی دشواری نہ ہو۔ انہوں نے تنبیہ کی کہ کارکردگی نہ دکھانے والے افسران کی محکمہ میں کوئی جگہ نہیں ہے۔سید عاشق حسین کرمانی نے کہا کہ جنوبی پنجاب کے 12اضلاع کی 55 سال تک عمر کی دیہی خواتین کو دو سالوں میں تقریبا 11ہزار جانور(جھوٹیاں/ویہٹریاں) تقسیم کی جائیں گی۔ اب تک اربن یونٹ کی جانب سے 11 ہزار 882 درخواستوں کی تصدیق کی جا چکی ہے جبکہ 412 جانور خواتین میں تقسیم ہو گئے ہیں۔
صوبائی وزیر لائیو سٹاک نے مزید کہا کہ جانوروں میں منہ کھر بیماری کو کنٹرول کرنے کے لیے جلد حکمت عملی وضع کی جائے۔انھوں نے منہ کھر بیماری کے نقصانات کو کم کرنے کے لیے ویکسین کی پیداواری صلاحیت کو مزید بہتر بنانے کی ہدایت کی۔اجلاس میں ایڈیشنل سیکرٹری لائیو سٹاک عثمان طاہر، ڈائریکٹر جنرلز( توسیع)، ڈائریکٹر جنرل (پروڈکشن)، ڈائریکٹرجنرل (ریسرچ)، پی آئی ٹی بی اور اربن یونٹ کے نمائندگان نے بھی شرکت کی۔