بوائین فیمرل فیور، تین دن کا بخار، ورل

Bovine Ephemeral Fever / Three Days Sickness / ورل دراصل ایک وائرس سے ہونے والی بیماری ہے جو کہ کیڑوں, مچھروں اور مکھیوں کی مدد سے پھیلتی ہے۔ اس کی علامات بہت واضح ہوتی ہیں مثلاً 107.6-104 ڈگری بخار، لنگڑاپن، آنکھوں اور منہ سے پانی کا اخراج، دودھ کی پیداوار میں کمی، کھانا پینا چھوڑ دینا اور سانس لینے میں دشواری شامل ہیں.

عمومی طور پر ہمارے کسان بھائی اسے سنجیدگی سے نہیں لیتے اور اس غفلت کا نقصان یہ ہوتا ہے کہ "ایک مرتبہ اگر اس بیماری کے باعث جانور کے دودھ میں کمی ہو جائے، تو واپس اسی اوسط پر آنے کیلئے کسان کو اگلے سُوۓ تک کا انتظار کرنا پڑتا ہے اور اس دوران جو معاشی نقصان ہوا وہ الگ”۔ لہذا کمرشل ڈیری فارمنگ سے منسلک لوگوں کو اسے سنجیدگی سے سمجھنے کی ضرورت ہے۔

‘اول درویش بعد خیش’ موسم گرما اور برسات سے قبل آپ کو اپنے فارم/ ڈیرا / حویلی پر موجود سارے جانوروں کو ویکسین کر دینی چاہیے اور 4-2 ہفتوں بعد ایک بوسٹر ڈوز لازمی لگائیں تاکہ آپ کے جانوروں میں وافر مقدار میں اینٹی باڈیز پیدا ہو جائیں۔

کیڑے مکوڑوں، چیچڑوں اور مکھیوں کا تدارک:

اپنے فارم پر صفائی ستھرائی کا خاص خیال رکھیں اور کہیں بھی پانی کھڑا نہ ہونے دیں اور گوبر فارم سے دور سٹور کریں۔ کم از کم ایک سے ڈیڑھ ہفتے کے دوران ‘سائپرمیتھنین’ دوائی کا پانی میں محلول بنا کر سپرے کریں۔ دیواروں اور فرش پر چونا ڈالیں۔

خوراک میں تبدیلی:

ورل کا موسم آتے ہی اپنے جانوروں کے راشن میں کیلشیم، سیلینیم، وائیٹیمن C اور E کی مقدار بڑھا دیں۔

علاج:

زیادہ بخار کی صورت میں جانور کے سر پر ٹھنڈا پانی ڈالیں اور NSAID’s کا استعمال کریں۔

اگر جانور کی حالت زیادہ خراب ہو تو کسی قریبی ڈی وی ایم ڈاکٹر سے رجوع کریں۔