وزیراعلیٰ پنجاب مریم نواز شریف نے روزگار کے مواقع پیدا کرنے، زرعی پیداوار میں اضافے اور دیہی معیشت کو مستحکم بنانے کے لیے ایک اہم اقدام کے طور پر “اپنا کھیت، اپنا روزگار” پروگرام کا اعلان کر دیا ہے۔
اس پروگرام کے تحت 50 ہزار افراد کو کاشتکاری کے لیے سرکاری زمین فراہم کی جائے گی، جس کا مقصد نہ صرف بے روزگاری میں کمی لانا ہے بلکہ زراعت کے شعبے کو جدید خطوط پر استوار کرنا بھی ہے۔
حکومت پنجاب کے مطابق اس اقدام سے خوراک کے تحفظ کو یقینی بنانے، پائیدار زرعی طریقوں کے فروغ اور نوجوانوں کو زراعت کو ایک باوقار اور قابلِ عمل پیشہ کے طور پر اپنانے کی ترغیب ملے گی۔
“اپنا کھیت، اپنا روزگار” پروگرام کو دیہی ترقی، خود کفالت اور زرعی معیشت کی بحالی کی جانب ایک اہم قدم قرار دیا جا رہا ہے، جس سے صوبے میں روزگار اور زرعی سرگرمیوں کو نئی جہت ملنے کی توقع ہے۔