تحریر: کرنل عبدالرؤف (ریٹائرڈ)
پاکستان میں صبح کا آغاز لاکھوں گھروں میں چائے کے ایک کپ سے ہوتا ہے، مگر اس کپ کے پیچھے ایک ایسا طبقہ کھڑا ہے جس کا ذکر ہماری معاشی پالیسیوں میں نسبتاً کم، جبکہ مشکلات میں بہت زیادہ ہوتا ہے۔ یہ طبقہ پاکستان کا چھوٹا ڈیری فارمر ہے۔
وہ شخص جس کے پاس چند گائیں یا بھینسیں ہیں، جو علی الصبح اپنے جانوروں کو چارہ ڈالتا ہے، دودھ دوہتا ہے، اسے مارکیٹ تک پہنچاتا ہے اور اسی دودھ سے اپنے بچوں کی تعلیم، گھر کا خرچ اور بہتر مستقبل وابستہ کرتا ہے۔ پاکستان میں دودھ کی پیداوار کا بڑا حصہ انہی چھوٹے فارمرز سے آتا ہے۔
بنیادی سوال: کیا ہماری ڈیری اور لائیوسٹاک پالیسی میں واقعی چھوٹا فارمر مرکزی حیثیت رکھتا ہے؟ بدقسمتی سے اس کا جواب نفی میں ہے۔
مسئلہ صرف مہنگائی نہیں، پورا نظام ہے
چھوٹے فارمر کی مشکلات کو صرف "مہنگا چارہ” یا "دودھ کا کم ریٹ” کہنا اصل مسئلے کو محدود کر دیتا ہے۔ حقیقی مسئلہ ایک کمزور اور غیر متوازن ویلیو چین ہے:
- فارمر مہنگا جانور، مہنگا چارہ، ونڈا، ادویات اور علاج خریدتا ہے۔
- بیماری کی صورت میں دودھ کم یا بند ہو جاتا ہے؛ بروقت حمل نہ ٹھہرنے سے آمدن رک جاتی ہے۔
- مارکیٹ میں لانے کے بعد فارمر کو اپنے دودھ کی لاگت اور منصفانہ قیمت تک معلوم نہیں ہوتی۔
خطرہ فارمر کا، سرمایہ فارمر کا، محنت فارمر کی—مگر قیمت پر اختیار کسی اور کا۔
مویشی پالنے والا نہیں، ‘Small Dairy Entrepreneur’
جس شخص کے پاس دو، تین یا پانچ دودھ دینے والے جانور ہیں، اسے محض مویشی پالنے والے کے بجائے ایک چھوٹا ڈیری کاروباری سمجھنا ہوگا۔ اسے درج ذیل بنیادی ڈیٹا کا شعور ہونا ضروری ہے:
- جانور کی روزانہ دودھ کی پیداوار اور فی لیٹر پیداواری لاگت
- خوراک کی یومیہ ضرورت (Feed Intake بمقابلہ Milk Yield)
- بریڈنگ (Breeding) اور ویکسینیشن (Vaccination) کا درست شیڈول
- منافع بخش جانور کا انتخاب اور ریوڑ (Herd) سے غیر پیداواری جانور کی بے دخلی
- دودھ کے معیار کی بہتری اور منصفانہ مارکیٹ کا تعین
کم دودھ دینے والا جانور، زیادہ خرچ
کم پیداواری جانور بھی وہی شیڈ، پانی، مزدوری اور جگہ لیتا ہے جو ایک زیادہ پیداواری جانور لیتا ہے۔ اس لیے جینیاتی بہتری (Genetic Improvement) کو پالیسی کا بنیادی ستون بنانا ہوگا۔
- Artificial Insemination، بہتر بریڈنگ، منتخب جینیات اور ریکارڈ کیپنگ کو دیہی سطح تک عام کرنا۔
- بنیادی فارمولا: اچھی نسل -متوازن خوراک- بیماریوں سے تحفظ – بہتر انتظام= زیادہ دودھ اور منافع
چارہ: ڈیری فارمر کا خاموش معاشی دباؤ
خوراک سب سے بڑا پیداواری خرچ ہے۔ چارے کے مستقل بحران سے نمٹنے کے لیے:
- ہر علاقے اور موسم کے مطابق باقاعدہ Fodder Calendar تیار کیا جائے (مکئی، جوار، باجرہ، برسیم، جئی)۔
- موسمی قلت ختم کرنے کے لیے Silage اور Hay Making کو چھوٹے فارمرز میں فروغ دیا جائے۔
- جانور کو صرف پیٹ بھرنے کے لیے نہیں بلکہ پیداوار اور صحت کے مطابق متوازن راشن دیا جائے۔
5. علاج سے بہتر بچاؤ (Preventive Veterinary Care)
ویٹرنری نظام کو جانور بیمار ہونے کے بعد علاج سے بدل کر پیشگی بچاؤ پر لانا ہوگا:
- باقاعدہ Vaccination، Deworming، اور Mastitis Control
- بروقت Heat Detection، Pregnancy Diagnosis، اور Calf Management
- صحت مند جانور فارمر کا سب سے قیمتی پیداواری اثاثہ (Productive Asset) ہے۔
کوآپریٹو ماڈل اور جدید ملک کلیکشن سینٹرز
اکیلا فارمر مارکیٹ میں مول تول (Bargaining) کی طاقت نہیں رکھتا۔ حل Dairy Farmer Cooperatives میں ہے:
- 30 یا زائد فارمرز مل کر دودھ جمع کریں، اجتماعی طور پر چارہ و ونڈا خریدیں اور بہتر ریٹ طے کریں۔
- ہر دیہی کلسٹر میں جدید Milk Collection Centre بنایا جائے جہاں:
- وزن، Fat، SNF اور بنیادی کوالٹی پیرامیٹرز ٹیسٹ ہوں۔
- دودھ کے معیار کے مطابق فوری اور شفاف قیمت طے ہو۔
لائیوسٹاک انشورنس اور کلائمیٹ ریزیلینس
| شعبہ | درکار اصلاحات |
| لائیوسٹاک انشورنس | جانور کی بیماری یا موت سے مالی تحفظ کے لیے آسان، شفاف اور سستی انشورنس اسکیمیں۔ |
| مالیاتی سہولیات | کلسٹرز اور کوآپریٹوز کے ذریعے چھوٹے فارمرز کو آسان شرائط پر قرض کی فراہمی۔ |
| موسمیاتی تبدیلی | شدید گرمی سے بچاؤ کے لیے Heat Stress Management، وینٹیلیشن، صاف پانی اور موسم دوست چارہ۔ |
حکومت، نجی شعبہ اور فارمر ٹریننگ
- حکومتی کردار: ہر ضلع میں Small Dairy Farmer Development Programme، کلسٹرز، ٹریننگ سینٹرز اور بنیادی انفراسٹرکچر کی فراہمی۔
- نجی شعبہ کا کردار: ڈیری کمپنیاں، فیڈ ملز اور بینکس چھوٹے فارمر کو اپنی ویلیو چین کا شراکت دار بنائیں تاکہ Win-Win ماڈل قائم ہو۔
- فارمر کی تربیت: فارم پر عملی تربیت دی جائے کہ خوراک کی تیاری، بیماری کی علامات، دودھ کی صفائی اور فارم کا حساب کتاب کیسے رکھنا ہے۔
چھوٹے ڈیری فارمر کو وقتی سبسڈی یا خیرات کے بجائے ایک مستقل نظام، شفاف منڈی اور کاروباری مواقع درکار ہیں۔ دیہی معیشت کو مستحکم کرنے اور قومی پیداوار بڑھانے کے لیے پالیسی کا مرکز اسی فارمر کو بنانا ہوگا جس کے ہاتھ میں دودھ کی بالٹی ہے۔