فیصل آباد: جامعہ زراعت فیصل آباد کی اسسٹنٹ پروفیسر ڈاکٹر مقدس علیم نے اپنی محنت، لگن اور ثابت قدمی سے ایک اہم سنگِ میل عبور کرتے ہوئے فلبرائٹ وزٹنگ اسکالر پروگرام 2026 میں نمایاں کامیابی حاصل کر لی۔
ایک سادہ دیہی پس منظر سے تعلق رکھنے والی ڈاکٹر مقدس علیم کا سفر اس حقیقت کی بہترین مثال ہے کہ محدود وسائل بھی بڑے خوابوں کی راہ میں رکاوٹ نہیں بنتے، اگر ارادہ مضبوط ہو۔
تعلیمی سفر کے دوران انہیں نہ صرف معاشرتی دباؤ بلکہ صنفی تعصبات کا بھی سامنا کرنا پڑا، تاہم انہوں نے ہر مشکل کا مقابلہ حوصلے سے کیا اور اپنے مقصد سے کبھی پیچھے نہیں ہٹیں۔
تحقیق کے میدان میں انہوں نے سویا بین جیسے اہم موضوع کا انتخاب کیا، جو پاکستان کے لیے انتہائی اہمیت رکھتا ہے کیونکہ ملک ہر سال اربوں ڈالر کی سویا بین درآمد کرتا ہے۔ انہوں نے جدید سائنسی طریقوں، بشمول ڈی این اے، پی سی آر اور لیبارٹری تحقیق کے ذریعے اس شعبے میں قابلِ قدر کام کیا۔
ڈاکٹر مقدس علیم نے اپنی تحقیق کے دوران معروف اساتذہ خصوصاً ڈاکٹر ذوالفقار علی اور دیگر سینئر سائنسدانوں کی نگرانی میں کام کیا، جس سے ان کی تحقیقی صلاحیتوں کو مزید نکھار ملا۔
بعد ازاں انہوں نے فیکلٹی ڈیولپمنٹ پروگرام میں کامیابی حاصل کی اور بین الاقوامی سطح پر اعلیٰ تعلیم کے مواقع حاصل کیے۔ ان کا دیرینہ خواب اس وقت حقیقت بنا جب انہیں امریکہ کے نیشنل سویا بین سینٹر میں تحقیق کے لیے منتخب کیا گیا۔
فلبرائٹ پروگرام کے تحت وہ پاکستان بھر سے سویا بین ریسرچ کے شعبے میں منتخب ہونے والی واحد خاتون اسکالر ہیں، جو ان کے لیے ایک بڑا اعزاز ہے۔
انہوں نے اپنی کامیابی کو اللہ تعالیٰ کے فضل، والدین، اساتذہ اور خاندان کی مسلسل حمایت کا نتیجہ قرار دیا۔
ڈاکٹر مقدس علیم نے بالخصوص دیہی علاقوں کی خواتین کو پیغام دیتے ہوئے کہا کہ وہ اپنے خوابوں پر یقین رکھیں، محنت جاری رکھیں اور کسی بھی منفی سوچ یا رکاوٹ کو اپنی راہ میں حائل نہ ہونے دیں۔