پنجاب میں لائیو سٹاک منصوبوں اور فلاحی پروگرامز کا جائزہ

صوبائی وزیر لائیو سٹاک و زراعت سید عاشق حسین کرمانی کی زیرِ صدارت محکمہ لائیو سٹاک میں ایک اہم اجلاس منعقد ہوا، جس میں محکمہ کے جاری ترقیاتی منصوبوں، مختلف فلاحی پروگرامز اور مویشی پال حضرات کو فراہم کی جانے والی سہولیات پر پیش رفت کا تفصیلی جائزہ لیا گیا۔

اجلاس میں سیکرٹری لائیو سٹاک پنجاب احمد عزیز تارڑ، ڈائریکٹر جنرل توسیع ڈاکٹر سید ندیم بدر، ڈائریکٹر جنرل ریسرچ ڈاکٹر سجاد حسین، ڈائریکٹر جنرل پروڈکشن ڈاکٹر کنور نعیم اور دیگر متعلقہ افسران نے شرکت کی۔

اجلاس میں مختلف منصوبوں کے حوالے سے پیش رفت اور ڈیجیٹل ڈیش بورڈ پر موجود تازہ ترین اعداد و شمار کا جائزہ لیا گیا۔

جنوبی پنجاب کی بیوہ اور مطلقہ خواتین میں مفت گائے اور بھینسیں تقسیم کی جائیں گی

بریفنگ میں بتایا گیا کہ خواتین کو معاشی طور پر مستحکم کرنے اور لائیو سٹاک سیکٹر کے فروغ کے لیے جاری وزیراعلیٰ پنجاب کے منصوبے کے تحت جنوبی پنجاب کی بیوہ اور مطلقہ خواتین میں مفت گائے اور بھینسیں تقسیم کی جائیں گی، جس کے لیے اب تک 68,700 درخواستیں موصول ہوئی ہیں اور تمام درخواستیں PSPA Verification کے مرحلے میں ہیں۔

وزیراعلیٰ پنجاب لائیو سٹاک کارڈ

اسی طرح وزیراعلیٰ پنجاب لائیو سٹاک کارڈ کے تحت اب تک 146,533 درخواستیں موصول ہوئی ہیں، جن میں سے 69,282 درخواستیں مسترد جبکہ 77,251 درخواستیں زیرِ کارروائی ہیں۔

NADRA Verification کے مرحلے میں 135,847 درخواستیں منظور، 10,241 مسترد جبکہ 445 درخواستیں زیرِ کارروائی ہیں۔

بریفنگ کے مطابق BOP Stage I Verification میں 135,847 درخواستوں میں سے 96,258 منظور، 35,817 مسترد اور 3,772 درخواستیں زیرِ کارروائی ہیں، جبکہ لائیو سٹاک کی فیلڈ ٹیم کی جانب سے جانوروں کی تصدیق کے مرحلے میں 96,258 درخواستوں میں سے 13,869 منظور، 23,224 مسترد جبکہ 59,165 درخواستیں زیرِ کارروائی ہیں۔

مزید بتایا گیا کہ BOP Stage II Verification کے مرحلے میں 13,869 درخواستیں زیرِ کارروائی ہیں، جبکہ کسانوں اور جانوروں کی PAITS میں رجسٹریشن کا مرحلہ آئندہ کارروائی سے منسلک ہے۔

FMD Disease Control Compartments کے قیام اور بیماریوں کے کنٹرول پر بریفنگ

ڈائریکٹر جنرل ریسرچ ڈاکٹر سجاد حسین نے پنجاب بھر میں جاری FMD Disease Control Compartments کے قیام، بیماریوں کے کنٹرول، سرویلنس اور منصوبے پر ہونے والی حالیہ پیش رفت کے بارے میں اجلاس کو بریفنگ دی۔

ڈائریکٹر جنرل توسیع ڈاکٹر سید ندیم بدر نے وزیراعلیٰ پنجاب لائیو سٹاک کارڈ سمیت مویشی پال حضرات کی سہولت کے لیے جاری مختلف پروگرامز، درخواستوں کی تصدیق، منظوری اور آئندہ مراحل کے حوالے سے تفصیلی بریفنگ دی۔

ویٹرنری ہسپتالوں کی اپ گریڈیشن اور جدید سہولیات

اجلاس میں جنوبی پنجاب میں بیوہ اور مطلقہ خواتین کو گائے اور بھینسوں کی فراہمی، خواتین کی معاشی خودمختاری اور مویشی پال خاندانوں کی آمدن میں اضافے کے اقدامات کا بھی جائزہ لیا گیا، جبکہ پنجاب بھر کے مختلف سرکاری ویٹرنری ہسپتالوں کی اپ گریڈیشن، جدید ویٹرنری سہولیات کی فراہمی اور جاری ترقیاتی کاموں پر بھی بریفنگ دی گئی۔

ترقیاتی منصوبوں پر کام کی رفتار تیز کرنے کی ہدایت

صوبائی وزیر سید عاشق حسین کرمانی نے ہدایت کی کہ جاری ترقیاتی منصوبوں اور فلاحی پروگرامز پر کام کی رفتار مزید تیز کی جائے، درخواستوں کی تصدیق اور منظوری کے عمل کو شفاف اور بروقت مکمل کیا جائے اور مویشی پال حضرات کو جدید اور معیاری ویٹرنری سہولیات ان کی دہلیز تک فراہم کرنے کے لیے تمام دستیاب وسائل بروئے کار لائے جائیں۔

انہوں نے کہا کہ حکومت پنجاب کا مقصد لائیو سٹاک سیکٹر کی پیداواری صلاحیت میں اضافہ، مویشی پال حضرات کی معاشی حالت بہتر بنانا اور جدید ٹیکنالوجی کے ذریعے محکمہ کی سروس ڈیلیوری کو مزید مؤثر بنانا ہے۔